– V.B. Hlychho, Siahatlâh.
Ei chiheih Marasawzy ta,
Reih aw ei ta, 40% chyhsazy pyly ta raisâh ama sa heih bao aw. Châhrasala, eima diathlâ leipa khiahta la, kô 2020 AD liata la thathina he eima ‘MÂPHA’ thei aw tah t’u!!
Chhaolei thohrawh ry liata mokuh ramâ vaw khaih ha hrasala, a bie ei nahkao liata châh thlâh hapa Puhpa K. Râtô (L) Tisôpi, athlâlô liata kô 100 hlei ta arohpa bie rônahpa khawh, “Eima nô & paw daihti liata la, adaotuhpa châ awpa chi ei ta, pietuhpa châ awpa amâ chhu tyh”, a tah cha maw!! Eima zo thei ma? Keila ei zo kaw. Kô 1956–1970 tawhta Tisôpi liata pahrâ na ta, ei pahno phapa rakha liata Tisôpi khih liata kâhsâ azyhpa ama tlô tyh. Chanota ei hmôpa pha kawpa ta ei pahnopa la V.C nahzy akhieh ei ta, odyh liata sâh a y hluh viapazy hiah ei ta, khichhai kâhsâ azyhpazy ama my pathlei lei n’awpa ta Baikai ta panuapa ta, nô-u pareisa leipa ta ama khih lâ ama paliesa tyhpa ei hmô bao!! (Sôhhryhpazy) he hâta eikha/a khôlâ chhao châh tyh ei ta; India pheisaih vaw tlôpazy chhao ama ngia aryh kaw ta, tlyliah liata miah pahmaoh tyh ei ta, mykha cha Achhyna-o liata miah pangiasa ei ta, ama Subedhar ta Abeipa bie bo nata châh reih vei, ‘Raihria leipa nie khah se’ tahpa bie miah chho ta, miah a papuasa khai nahta eima tao awpa chyu tao awpa ta miah a chho châ!
Eima pachutuhpa ramâ khaih ha hrasa la, athâpha rei na ai vei. Zachhih ngaitapa Puhpa A. Kiapô (L) cha, “Bâna daihti 3:00Pm he la sawhkhâ bie châta, keima bie la a dawh y vei, lyusie penawh ama tlô tita”, tah ta, dawh 3:00 Pm la pachâ beih ma pi. Point kha chyuh ei reihchhi aw; Apakhy lei zâ ruapa liata thohna hmô, MB No 3, A.P.C. hmô hluhpi a Jacket byh lai kawpa liata a vao ta, tlâh leipa odyh thotlâh liata la hluh taraw vei. Apakhy zâ ta bâ daihti liata ama o ngai tua khao leipa ta tlâhleipa nata bao byuhpa a pahnopa o liata thlahchhâna hmia pasahpa ta mohôhna rai a hria tyh. Ro heih tita reilaihpa châsala. Ei pachâ tyh, a pahrâna khih chyhsa eimâ chu kaw hlei leipa vâta a hriapasana hawhta eimâ chhua-ua thei leipa ta ei pahno.
Eima bie reikhohpa atheithlâhna chôta reih laih ei sih la, chhithatuhpa hropa hluhpi chhaota hriapasa ta keimo atyuhnie chyu awpa ta pachuna maniah ama pie tyh. Chahawhna hra chata âmo daihti liata pachutuhpa 24 pazy he atanoh eima râh châta ama theina vaw hmâh khai tuhpazy vaw châ khai ha ei ta; Jerusale thiehpa tawhta na tah leipa ta cha â hiahri thai’pa châ khao vei. Ramâ hawh ama châ khai haw.
Atahmâ cha School liata pachutuhpa Average ta5 a ypa hawh eima châ thei aw. Châhrasala chyhsa hmiatua-pazy 24 pa hlâta eima tha a tlô viana a y tlyma?? Keima arohtuhpa he châ via chai na ta, eima Saku hâti chyuzy hry ta pakha chhâta eima thâ amâ ngiah kaw awpa rei awpa eima y hr’aw vâ ma?
Saku hluh via liata cha ahriaphapa 3 zy vâta ahropazy hlao tlâ eima vaw la thlâh hrapa hawhta pachâ na ta, eino avaw za kaw tyh. Taopha achhuah na ta, eichhuah via nahta atymâna pôh via ta, hriapha ei chhuah nahta pabuatuhpa ama hluh viapa hawhta ei pachâ.
He hawhna hra heta rai hropa ahneipa zydua he eima hriana tha nata daihti pasupa ta hlao hmô awpa châ ei sih la cha niekhi hmô lei awpa he 60% eima châ thlâh ha awpa ta ei pachâ cha maw. Mara râh liata chyhsa riahphapa 40% zy he ama thi pathlei hlâta 60% pachyu leipazy pi eimâ hra pah-ra abyuh ei tah kaw cha maw.
Eima rai chyu liata eima tah no heta Abeipa ryhraopa eima tah lilaw ha tua aw. Eima rai chyu tawhta Awnanopa liata Department hro hropa, N.G.O liata, Group liata chyhsa pakha ta rai (post) hluhpi vaw chakao ha ta, kha chyhsa kha ano kho ta rai â pangaih thlâh hapa châ leipa ta, eima ‘RÂH& AWNABOPA’ vâ vaw châ ha ta, he vâna tlai heta daihti nata su soparyh thai aru ngaitapa a châ. Hezy thaichâna ta hmâh ta eima hriana chaipa ta daihti avaw to chyh hapa he kheihta eima tao aw??
He he ryhpaohna ahmâhpa ama olyu chhôhkha pachâ leipa ta a chô liata rai zydua nietluana hawhta vaw pachâ ta khâpa kyh liata hmahta hlaotlohna hnei leipa ta, viasa hlaotloh viapazy liata apahnieh ta ku raihria a pachâ khao leipazy he kheihta eima chhihtha aw??
Hezy tho ta kuta raihria ta lyu, sahdô, leipalie nata hmohropa ahriatuhpa, nohcha-reih hriahlaopa ta nie atluapa Mistiri, Contractor-zy chhaota ama ku tawhta apuapa tlai ta ma chhôhkha ama pasa ma, Office tawhta hriapha kaw hleileipa ta vâhneina chadaipa ta maw? tahpa he âmo nata âmo ta â hiahhri ei sala, kheihta amâ chhy aw?
Puhpa Râtô(L) pyly ta a reipa la, “Keimo ku tlai ta eima hriapapuapa eima niepa la pahâh ta, eima palôhrupa thadâh ta, eima mokuhpahâh kaw ta. Ahy riah vai awpa y leipa ta, noh vaw chhipa zydua he nohlynô a châ khai”, atah cha maw. Eima zo ma?
Khâpa kao lia rai ta chyhsa 40% zy he la he bie he ama tovyuh châ aw ta, a zawvaw laihpa 60% zy hela noza hmiachhie laihna chôta eima hro noh a tla aw tah t’u?!!
Recent Comments