– Herbertson Syuhlô, CEO.
Puhpa K. Vanlalliana, DCEO, MADC cha târi 10. 2. 2016 liana khata ano chakaochahlâhtuhpazy chhaota Mawhro nata Chheihlu khih liatazy Education Awareness Campaign hnei awpa ta Siaha puasaipa ta sie pi ta, zâlâ dawh 3:00 pata Mawhro liata Pachutuhpa, Saku hâti, nô nata pawzy ta maniah vaw dy ei ta, eimâ ly ngaita kaw.
Azo lâta NGO, Pachu-tuhpazy nata VC nôpawzy nahta apakyhna daihti pha kawpa hneipa châ ta, he lia heta Mawhro khih châta hmo peimawhpazy hleikhô ta achuna kyh liata Mawhro khih ta hmah ama sie via lymâ thei n’awpa kao nano nanopazy reihpahmaohpa châ ta, eimâ thôhkhei kaw saipa ta ei pahno.
A mylâpa, târi 11. 2. 2016 mydi pati nie hlâta Saku hâtizy hnohta DCEO ta pasyuna biezy reihpa ta, mylâ hânoh eima râh chhithatuh awpazy amâ châpa vâta tiamana nata ngâchhihna chôta achu hnolo ta, hlaotlohna topa ta, viasazy hlâta thai patluapa châ achhuah chyu awpa ta pasyu ei ta, Saku hâtizy chhaota amâ thôhkhei kaw saipa ta pahnopa a châ.
He noh dawh 10:00 Am liata Saku o sa thiehpa RCC O Rs 16 lakhs hryuhpa ta sapa cha Puhpa K. Vanlalliana, DCEO ta a pahy. DCEO chata biereina hneipa ta, Mawhro khih ta zâhkô tawhta achuna kyh liata thata hmahsiena ama hneipa cha aly’pa châ kaw ta, hmahla via lymâ awpa ta bie ta ei ta, Saku o thiehpa nata zakhei achhih lei kawpa ama hneipa vâta âlykheizie nata hmialâ daihti liata chhao mohôh pha ta, pasô kaw awpa nata pathaipha ngâthlâh ha awpa ta pasyu ei ta. He Saku tawhta châthaipa hluhpi ama pua lymâ thei n’awpa ta khokheina chhao a hlâ pâ hra ei. He Saku o thiehpa pahyna lia heta Programme nano nanopazy taopa châ ta, MTP ta Sawlâkia nata MCHP ta Awhkhypa lâ ama pamosapazy chhao a rônah kawpa ta eima pahno.
Zâlâ dawh 1:00 pm ta Mawhro puasai pi ta, Chheihlu cha zâlâ dawh 1:30 pm pata eima tlô. Khihtlâh nôpawpazy nata NGO’s chhithatuhpazy ta maniah vaw dy ei ta, eimâ ly ngaita kaw. A mylâpa mydi dawh 6:00 Am tawhta 8:00 Am taihta Chheihlu Middle School hâtizy hnohta daihti ahmâpa châ ta, DCEO ta Saku Hâtizy hnohta pasyuna biepha ngaitapazy reih ta, amâ thôhkhei kawpa ta pahnopa a châ.
My dawh 10:00 tawhta 12:00 Noon likawh liata pachutuhpazy nata nôpawzy chhaota apakyhna hneipa châ ta, khihtlâh châta peimawh-pazy nata achuna liata peimawhpazy reipahmaohna daihti pha kawpa ahmâpa a châ hra.
Zâlâ dawh 1:00 ta Chheihlu khih puasaipa ta Siaha eima kaw pangai heih. He Education Awareness Campaign he hlaotloh kaw ta, eima tly laihpa khihzy chhaota amâ thôhkhei kawpa ta pahnopa a châ hra.
He Mawhro nata Chheihlu khih liata DCEO ta Education Awareness Cam-paign ahneipa he Puhpa Benjamin Hlychho, DDPC nata Puhpa Herbertson Syuhlô, CEO zy ta eima chakaochahlâh hra.
Turkey liata nôvah baokha ahneipazy ta syrian refugee 4,000 zy châta kyhchhi achhuanoh
Kilis khihpi, Turkey râh chho lâta a ypa liata hmo tlôpa chata khizaw palôh pahnie kaw ta, Internet nata Media liata thata reithaina reikah thei’pa a y hai. He khih liata nôvah baokha chata amâ hneina noh liata râhchhôh buana vâta abohna tluapa ta Syria râh tawhta Turkey râh lâ arâpa (Refugee) manôh 4,000 zy châta kyhchhi rônahpa ama pachhuapanoh. Daily Beast Report ta a palâsana liata Fethullah Uzumcuoglu nata Esra Polat zy nôvah heta amâ hneina noh lia heta ahneina chysia akyna chôta Syrian tawhta Refugee-zy châta pati he raih ei ta, pahneisilina chôta Refugee zy kiah liata daihti ama hmâh.
Recent Comments