Editorial

Reihtuhpazy pachâthaina eimâ haw. Eima vaw papua tyhna daihti liata vaw papua thei leipa pi ta, pei eima tah kaw. Dyu eima tlai leipa cha kao kha; buakheituhpazy sapa chieh-leina nata Khaw lâchhâh rairuna ta miah patypamâ pâ heih ta, charâta eima vaw patlô thei khao vei.

A daihti liata eima papua thei khao lei vâta, atahmâ thla Issue he cha aparaparôpa ta tlâ tao pi ta, Issue hmiatuapazy hawhta a mihtlaoh lyu ngyu thei aw. Spelling Mistake nata paryhparina asupia leipa chhao a hluh kaw aw; nama pachâthaina eimâ haw chanei.

Eima Magazine nawh kawpa nama vaw pasô pakhei kaw tahpa vaw pahno pi ta, eima tha a pawh ngaita kaw. He vâ heta apahâ thai awpa châ ma pi tahpa eima sia via rili heih. Châpaw nata Hlaphôhzy a vaw ngia lymâ ta, avaw ngia tuapa maih tlâ eima vaw papua tua lymâ. Regular kawpa ta vaw pangiapa chhao y pi ta, a ly â chhih hmeiseih. Anodeikua, Issue to ta papua awpa eima kâchhie daihti y ta, mohropazy ropa eima tleihai tyh hra; rie pahnothai s’u.

A mâ deikua eimâ hnabeiseihna hawhta hmô pha ma pi. He he Mara reih ta Magazine nata Thâtihbuzy ta rairuna eimâ tyh tyhpa hmo miakha a châ. Mara reih nata Literature hmahsiena châta eima phahnai theina kao na a châ tahpa sia chanei heih ei suh u. Rie pangia lymâ suh vy.

Rei hluhpa pha ta, he hlâ heta ro hluhpa pha via heih ta, roh hluh ta rei hluhpa a sôh via heih. Chavâta, Mara reih he reih hluh ei sih la, roh hluh via ei sih la, Mara reih angia zie nata sôhzie eima pahno rili aw.