SIAHA, 01 Di, 2023, Chutynoh – Atanoh dawh 11:30 AM khata Farmers’ Training Centre, MADC Complex, Siaha liata Puhpa K. Chhihrau, Executive Secretary, MADC ta Revd. NC. Vabeilua châbu ropa ‘I have a dream (Mâ ei sa)’ cha zawpi reih thei awpa ta a palâhâh.
Programme he Puhpa Laicho Nôtlia, Vice Chairman, BML, MADC ta chhihtha ta, Pihnô P. Chaki, President, MCHP HQ, Siaha ta Rawma 11:36 bie “Ano tawhta, Ano vâta, Ano châta, Hmo to a ypa a châ. A hnohta chhâzaw ta rônahna y mawh sy! Amen,” tahpa reina a hnei khai tawhta thlahchhâna ta daihti a pathao. Pihnô K. Pari ta châbu saichhieliena hnei ta, laihsa B. Beihruaki ta hlasapa ta zawpi a palôpahawh.
Puhpa K. Chhihrau, ES chata, “Revd. NC. Vabeilua, Author he USA lâ ei sie nota a peimawh angiapa zydua na baokhatuhpa nata USA liata su peimawhpa ei tly awpa na chho khaituhpa châ ta, ano châbu ropa kei ta palâhâh thei awpa ei vaw châ thlâhpa he ei ly hmeiseih,” tahpa ta biehmia liata a reih.
“Eima râh ta eimâ phahla chaipa cha châbu rei eima thathi ta, eima chalei chiehpa chhao reih hoh leipa pi ta, châbu phapa chalei hoh hra ma pi, Internet liata tlua ta châbu phapa Top 10 liata â hlaopazy he chalei ta, eima reih hluh awpa he a peimawh ngaita kaw,” tahpa ta ES ta a reih.
ES chata, “Châbu a reih hluhpa he hmo pachâna siapa, adopa ama hnei tyh. Châbu eima reih hluh khiahta la eima palôhrupa tiah ta, chyhsa pahnothaina chhao eima hnei hluh via hra. Châbu eima reih hluh khiah communication skill chhao a papha via hra aw,” tahpa ta a reih.
“Châbu eima reih chyh tu vâta polite hra ma pi, châbu eima reih hluh khiahta la, stress (palôh rietheina, pasaipa-ina) chhao hnei ma pi. Biehrai reih hluh awpa zy he a za peimawh ngaita kaw. A thai sopa ta ama reih dâh ta cha, châbu reih hluhpa he hropareihna a châ ama tah. Châbu reih hluhpa chyhsa cha ama hro aly ta, ama nokhih via hra,” tahpa ta ES ta a reih.
ES chata, “Châbu reih hluhpa he hmo thiehpa pahnona chhao a châ. Râh chhihthana kyh lia chhao, châbu reih hluhpazy he cha râh chhihtha chhao ama thai via hra. Châbu reih hluhpa chyhsa cha ama hrialâhpazy adaoh dâh chhao ama thai via hra,” tahpa ta a reih.
“Châbu eima reih chyh tu vâta eima chyhsaheihpa liata chhao relationship phapa hnei thei ma pi. Eima society paphasa awpa ta cha Library zy tly hluh sih la, châbu eima reih hluh via awpa he aza peimawh ngaita kaw. Eima daihti ruapa hmâh thai ta châbu eima reih hluh via awpa peimawh ta, châbu eima reih hluh khiah hro dopa hnei pi ta, eima hro chhao â ly via hra aw,” tahpa ta ES ta a reih.
He châbu palâhâhna programme he Board of Mara Literature (BML), MADC pachhuapanohpa a châ.
Puhpa K. Chhihrau, Executive Secretary, MADC he Official lâ tawhta Puhpa Pawsa Lava, AITO nata Puhpa K. Nehemia, Cameraman zy ta ama chakaochahlâh.
Revd. NC. Vabeilua, Author ta alynabie reina a hnei khai tawhta Abeipa thlahchhâna reihparaohpa ta daihti pachhâsapa a châ.
