PRESS RELEASE
NO. 67/2023
SIAHA, 27 Pachawh, 2023, Pohbiehnoh – Atanoh my dawh 10:30 Am pa ta Board of Mara Literature (BML) pachhuahpanohpa Puhpa B. Tekô (L), Puhpa H. Sawlawmaw (L), Puhpa Laila Khithie (L) zy hla achupahmaohna Seminar cha Farmers’ Training Centre, MADC Complex, Siaha liata hneipa châ ta, Puhpa MH. Tiabi, EM (MS) & Chairman, BML, MADC cha khichhai laipa (chief guest) châpa ta â hmâkhei ei.
Seminar programme he Puhpa Laicho Nôtlia, Vice Chairman, BML, MADC ta chhihtha ta, Rev. H.B. Samuel ta Abeipa lâ pavaosana thlahchhâna daihti â hmâh.
Resource person Puhpa LB. Thatlô ta Puhpa H. Sawlawmaw (L) hlazy achupahmaohna daihti hmâh ta, Resource person Puhpa FC. Chhuasa chata Puhpa Laila Khithie (L) hlazy achupahmaohna daihti â hmâh hei hra.
Pihnô Alfina Ngopawsia ta pahnie kawpa ta hlasapa ta zawpi a palôhpahawh ei.
Programme he first session nata second session ta pachhaihpa châ ta, second session liata Puhpa Viasai Solo, EE, PHED, Siaha ta Puhpa L.B. Thatlô châbu, ‘Vâ-iana Hla thokha nata ama vaw phina chhâpa’ tahpa a palâhâh.
Laihsa Femina Hlychho ta Puhpa L.B. Thatlô châbu, ‘Vâ-iana Hla thokha nata ama vaw phina chhâpa’ tahpa saichhieliena hnei ta, atanoh ta Puhpa L.B. Thatlô châbu palâhâhpa chhao heta Mara reih ta châbu a ropa bu chaki (9) a rona a châ.
Puhpa MH. Tiabi, EM chata Mara reih hmahpasiesa â chhuahzie reih ta, Mara zawpi zydua nata hriaparaohna phapa hnei a peimawhzie reih ta. Anodeikua, eima zydua ta literature eima pahâh leipa chhaota chyhsa chyhta a pahâh kawpa tawh chhaota thata literature ama promote theizie, a reih.
“William Shakespeare chhao ano mo pakha ta thata mongyuh reih a promote,” tahpa EM ta a reih.
EM chata Phura khih liata BML Seminar hnei amâ chhuahzie reih ta, Noaotlâh khih lia chhao Mara reih pachutuh awpa tuah amâ chhuahzie chhao, a reih.
“Dr. S. Hrachu (L) a hroh thlâh no khata nâ cha tiama kawpa ta châ roh hluh via lymâ la, O a vaw kâ tlamaw hapa chhaota, O kâpa la vaw leipa la, O kâpa padiatuh awpa la chyhsa hluhpi ama y thlâh ha na, Mara châ rohtuh awpa deikua hluh veih ei,” tahpa ta ei reih e, tahpa ta EM ta a reih.
EM chata BML ta Mara Literature hmahpasiesa via lymâ n’awpa liata Mara zawpizy advice nata contribution a peimawhzie a reih pâ heih hra.
Puhpa MH. Tiabi, EM, MADC he Official lâ tawhta Puhpa Pawsa Lava, AITO nata Puhpa K. Nehemia, Cameraman zy ta ama chakaochahlâh.
ISSUED BY:-
Information & Publicity Department
Mara Autonomous District Council
Siaha.
